Mumbai, Jylliew:
Ka sorkar Maharashtra kumba ka la mang, ka la ong ba kan yn ym pynduna ïa ka jingïarap ba la mang na ka bynta ki ritpaid ha ka jylla ha kaba kine kin sa ïoh jingmyntoi na ka jingïarap jong ka sorkar.
Ha kaba ïadei bad kane, ka la bthah ïa ki heh ba dei khmih ba ki dei ban pyntikna ha ka ban pynïoh jingïarap sha ki longïing jong ki rit paid kiba im kyrduh ha kaba la ong ba kane ka jingthmu ban pynbiang ïa ki jingïarap na ka bynta jong ki ka long ban pynïoh jingïarap kumba la mang na ka bynta jong ki.
Ka sorkar ka la dep ban pynbna ïa ki jingai jingïarap bad ki jingkyrshan na ka bynta ki ritpaid da kaba pynbna ban ai pisa na ka bynta ki khynnah pule kiba wan na ki longïing ki baduk bad kyrduh kiba sah ha ki Hostal jong ka Minority Development Department ha ka jylla.
U Nawab Malik, uba long u nongaitktien jong ka Nationalist Congress Party bad kumjuh u Myntri ha ka kynhun Myntri jong ka Maharashtra u la ong ba ïa kane ka pisa yn sat hep beit beit sha ki Bank Account jong kine ki khynnah.
Ha ka por ba la pynbna ïa katei ka jingai jingïarap, uMalik ha ka jingphah khubor lyngba ka Twitter u la ong, “Ka Department of Minority Development ka la sdang ban duh ia kitei ki Hostel sorkar ha kiba bun ki jaka kiba don ha ka jylla bad ki khynnah kiba wan na ki longïing bad ki kynhun rit paid kiba sah ha kine ki jaka bad kiba don jingthmu ban ïai bteng ïa ki jingpule jong ki sha ki kyrdan kiba kham shalor kin sa ïoh ïa ka pisa na ka bynta ka bai bam jong ki. Ïa kane ka pisa yn sa thep beit beit sha ki Bank Account jong kine ki khynnah.”
“Ka jingsiew kaba man u bnai kan long T. 3,500 bad yn sa ai sha ki khynnah kiba sah ha A, B bad C Class jong ki Hostel ka Municipal bad Divisional City bad T. 3,000 yn sa ai sha ki khynnah kiba sah ha ki Hostel kiba don ha ka distrik bad ki thaiñ ba bun,” la ong u Malik. U Myntri u la ong shuh shuh ba ïa kane la dep ban rai hashwa ban pyntreikam ha u snem jong ka pule-puthi kata ha u snem 2021-22.
