Bengaluru, Jylliew:
Shi sngi hadien ba ka sorkar kmie ka la kyntait ban pynbiang khaw sha ka Karnataka, u Myntri Rangbah katei ka jylla u Siddaramaiah u la ong ba ka jylla ka la buh jingkylli bad pan jubab na ki lai tylli ki kynhun wad bniah jong ka sorkar kmie ha kaba ïadei bad ka jingphah ïa u khaw na ka bynta ka jingtreikam jong ka Anna Bhagya Scheme, kaba la tyrwa jingïarap da 5 kilo u khaw sha ki longïing kiba shah kynthup hapoh ka Below the Poverty Line (BPL).
U la ong ba ka jingïakren ha kaba ïadei bad kine ki kynhun halor ka jingbuhdor ïa u khaw ka dang ïai bteng haduh mynta.
U Siddaramaiah u la kynthoh jur ïa ka sorkar kmie halor ka jingkyntait ban pyntreikam ïa ka skhim bad kaba la dei ban pyntreikam noh kloi hadien ba ka seng Congress ka la wan ha ka bor synshar ha Karnataka, ha kaba u la ong ba kane ka jingleh jong ka sorkar kmie ka la long ka jingpyrshah jur ïa ki briew ki baduk bad kynnoh ba kane ka jingleh jong ka sorkar kmie ka long ban pyntlot noh ïa ki rukom pyntreikam ki ban ai jingmyntoi ïa ki longïing ki baduk bad kiba kyrduh.
