Chennai, Jylliew:
Shi sngi hadien ba ka Madras High Court ka la buh shwa ïa ki hukum ha kaba ïadei bad ka jingshahkem jong u Myntri ka Tamil Nadu u V Senthil Balaji ha ka 14 tarik, Jylliew, ka ïingbishar ha ka nongbah ka la pynjlan shuh shuh na ka bynta ban set ïa u haduh ka 12 tarik, Naitung. Ka High Court, ka la dep ban bishar bniah halor ki jingmudui ba la phah da ka kurim jong u Balaji ka S Megala ha kaba kan sa ai ïa ka rai ha kaba ïadei bad kane. Ka Megala ka la phah ïa ki jingpynshisha baroh sha Madras High Court ha kaba ka la kynnoh ba u heh nongïalam jong ka seng ha ka jylla u K Annamalai u la buh ïa ki jingkynnoh bym hok pyrshah ïa u Senthil Balaji.
Ha ka jingpynshisha ba la phah, ka S Megala ka la ong, “U heh nongïalam jong ka seng BJP ha Tamil Nadu u K Annamalai u la kren naduh u bnai Nailar, 2022 shaphang ka jingthmu jong u ban leh ei ei pyrshah ïa u Myntri jong ka Tamil Nadu u V Senthil Balaji lyngba ki bor ka aiñ jong ka sorkar kmie.”
Hashwa kane, kata ha ka 14 tarik, Jylliew, u Senthil Balaji u la shahkem ha ka kynhun Enforcement Directorate (ED) hapoh ka jingtreikam jong ka Prevention of Money Laundering Act (PMLA) halor ka jingshah kynnoh donkti ha ka kam bamsap kaba la mih na ka jingthung kam kaba la jia ha ka por ba u dang long u Myntri ba dei khmih jong ka Transport ha ka sorkar jong ka seng AIADMK ba la lam khmat da ka J Jayalalithaa kaba la khlad noh.
