Kolkata, Naitung:
U Lat jong ka West Bengal u C V Ananda Bose u la ïakynduh ïa u State Election Commissioner (SEC) u Rajiva Sinha ha ka taïew ba la lah na ka bynta ban ïakren halor ki jingshngaiñ bad haduh katno ka jylla ka la pynkhreh na ka bynta ka ilekshon Panchayat ka ban sa long ha ka 8 tarik, Naitung. Kumba la sakhi, la ong ba ki la don bun tylli ki jaka kiba la mih ki jingïakynad ha kaba ïadei bad ki kam saiñ pyrthei ha kaba haduh mynta la ïoh jingtip ba ki la don kumba phra ngut ki briew kiba la shah pynïap ha ki jingïakynad.
Kine ki arngut ki la pynlong ïa ka jingïalang kaba la neh da kumba ar kynta ha Raj Bhavan ha ka sngi U Blei jong ka taïew ba la lah. Ïa ka jingthmu ban pyntreikam ïa ka kynhun pahara jong ki shipai ka sorkar kmie la pynsahteng shwa na ka bynta ban pyndep ïa ki jingpyntreikam kiba ïadei bad ka ilekshon kumba la hukum da ka Calcutta High Court bad phah sangeh shwa da ka Supreme Court. Kumba la ïathuh ka kaiphot, la ong ba ka sorkar jylla ka la pan ïa kumba 822 tylli ki kynhun jong ki shipai ka sorkar kmie ha katei ka taïew.
