Mumbai, Naitung:
Ka kynhun ba la ïatreilang hapdeng ka kynhun National Investigation Agency (NIA) bad ki pulit jong ka Mumbai ki la pynlong ïa ka jingleit khynra sha saw tylli ki jaka ha Mumbai bad Pune ha ka step jong ka lah sngi U Blei bad kem ruh ïa saw ngut kiba la shah kynnoh ba ki dei ki nongïarap jong ka kynhun lehnoh Islamic State. Kumba la ïathuh ka tyllong khubor, la ong ba kine kiba la shahkem ki la shah buddien bad shah khmih bniah naduh basdang jong u snem 2021.
Ki heh ka kynhun, ki la ïathuh ba la ïoh ban kurup ïa shibun ki tiar kiba long beaiñ na kine kiba la shah kynnoh bad na ki ïing jong ki ha ka por ba la pynlong ïa ka jingkhynra.
U Tabish, u la shahkem na Mumbai, ha kaba u la shah pynshisha ba u la long u snar nongïalam jong ka kynhun ha kaba u la smai ban ïatreilang bad u Amir, uwei pat uba la shahkem lang, bad u la thoh ruh ïa ki Article ha ka Magazine jong ka kynhun IS ka ‘Voice of Hind’.
U Zubair, u la shahkem na Pune, une u la shah pynshisha ba u la ïatreilang bad ka kynhun ISIS Shimoga ïa kaba la shah pyntroiñ hashwa.
Ha ka sngi U Blei, ka kynhun NIA ka la pynlong ïa ka jingkhynra ha ki san tylli ki jaka, ar tylli ha Patna bad mar kawei ha Darbhanga (Bihar) ha Surat (Gujarat) bad ha Bareilly (Uttar Pradesh) ha kaba ïadei bad ka jingdonkti jong ki bad ka kynhun Ghazwa-e-Hind, ka kynhun ba la pynïaid da ki lehnoh jong ka kynhun ha Pakistan.
Ka jingtohkit ïa kine kiba la shahkem kan sa ïaid shakhmat khnang ban lap dien shuh shuh.
Ïa ka jingmudui halor ka jingjia, la buh hadien ka jingshahkem jong u Marghoob Ahmad Danish ba la tip ruh da ka kyrteng kum u Tahir jong ka thaiñ Phulwarisharif jong ka Patna da ki pulit ka Bihar ha ka 14 tarik, Naitung jong u snem ba la lah.
Ka kynhun NIA ka la shimti ban tohkit halor ka jingjia hadien phra sngi jong ka jingshahkem jong u.
U Danish u la shah mudui ha ka 6 tarik, Kyllalyngkot hapoh kiba bun ki kyndon jong ka Indian Penal Code bad ka Unlawful Activities (Prevention) Act.
