Kolkata, Naitung:
Ki pulit jong ka West Bengal ha ka Lah Sngi U Blei ki la lap ïa ka metïap jong u nongïalam jong ka seng BJP, u Bankim Hansda, na ka thaiñ Bodo jong ka Purulia distrik ha ka jylla.
“Ha kane ka step ki pulit ki la lap ïa ka met ïap jong u nongïalam jong ka seng BJP ba la tip kyrteng kum u Bankim Hansda, uba long u President jong ka seng BJP, na ka thaiñ Jodgoda,” la ong u Vivek Ranga, uba long u President jong ka seng BJP ha ka distrik ha ka Lah Sngi U Blei.
Ka jingtohkit ha kaba ïadei bad kane ka jingjia ka dang ïai bteng. U DSP jong ka Purulia distrik u Abhijeet Bandopadhyay u la ong ba ka jingtohkit ha kaba ïadei bad kane ka jingjia ka dang ïai bteng. Kane ka jingïap jong une u nongïalam ka seng BJP ka la long ha ka por ba dang jur bha ki jingïakynad ha ka por ba don ka ilekshon Panchayat.
U Lat jong ka West Bengal u CV Ananda Bose ha ka Lah Sngi U Blei u la kynthoh ha kaba ïadei bad ka jingïai bteng jong ka jingïakynad ha ka por ba don ka ilekshon Panchayat bad la ong ba kine ki jingïakynad ki la shah ñiew ba ki long kum ka saiñ pyrthei jong ka jingïapynïap briew, ka jingthombor bad ka jingleh donbor.
