New Delhi, Naitung:
Ka Election Commission ka la pyllait paidbah ïa ka ‘web portal’ kaba thymmai ban ailad ïa ki seng saiñ pyrthei kiba la ïoh jingithuh ba kin phah ïa ki jingkheiñ haba ïadei bad ka pisa kynthup ki kaiphod ba noh synñiang, ka jingkheiñ kaba shisien shisnem kaba la dep pynbit pynbiang (audited) bad ki jinglut jingsep ha ka por ilekshon.
Ka jingdon kane ka portal la khmih lynti ba kan pynlah ban bud ryntih bad wanrah ka jingkheiñ jingdiah kaba shai.
Ka Election Commission ha ka shithi sha ki seng saiñ pyrthei ka la ong ba lyngba kane ka portal ka don ka bynta ban phah ki jingpynkynmaw sha kiba mihkhmat ïa ki seng saiñ pyrthei khnang ba ym dei ban lait bad ki tarik kiba la buh.
La ong ba kino kino ki seng saiñ pyrthei ki bym kwah ban phah ïa ka kaiphod halor ka pisa tyngka ki hap ban pyntip ïa ki daw sha ka EC lyngba ka ka jingthoh.
Ha ka shithi, ka EC ka la ong ba kane ka portal ka don ar tylli ki jingthmu. Kawei ka long ban plie lad ïa ki seng saiñ pyrthei ban weng ïa ki jingeh haba ki hap ban phah ka jingkheiñ da kaba wanrah markhmat bad kawei pat ka long ban biang por ka jingphah ki jingkheiñ jingdiah ha ka rukom kaba la pynbiang lypa.
Kine ki jingkheiñ dei ban phah da ki seng saiñ pyrthei sha ka Election Commission/Chief Electoral Officer ha la kijong ki Jylla katkum ka Representation of People’s Act, 1951 bad ki kyndon ban don ka jingkheiñ jingdiah kaba shai kumba la pynmih da ka Commission na ka por sha ka por.
