Thiruvananthapuram, Naitung:
Naba ka jinghap jong u slap ka la ïai bteng ha Kerala ha ka Lah Sngi UBlei ha kaba ka la shim ïa ka jingim jong kawei ka khynnah, u Myntri Rangbah jong ka jylla u Pinarayi Vijayan u la kyntu ïa ki briew ba ki dei ban kiar shwa ha ka ba leit shajan ki wah, ban leit jingleit lyngba ki jaka ba long lum bad ka jingleit shangkai sha ki rud duriaw.
Kane ka jingkyntu jong u Myntri Rangbah ka la long hadien ba ka kynhun India Meteorological Department (IMD) ka la pynmih ïa ka hukum ba ki briew ki la dei ban phet shnong bad kynriah jaka ha ki ar tylli ki distrik, kata kiba ha Idukki bad Kannur jong ka jylla.
Nalor kane, ka kynhun IMD ka la pynmih ruh ïa ki jingmaham ba ki briew ki la dei ban long kiba husiar ha kiwei pat ki 10 tylli ki distrik. Ïa ka jingmaham ba la dei ban long kiba husiar na ka jingïai bteng jong u slap ha baroh ki distrik lait noh ka Thiruvananthapuram bad Kollam na ka bynta mynta ka sngi, ka sngi Balang ruh.
Naba u slap u la hap ha kiba bun ki bynta jong ka jylla, kawei ka khynnah kaba shong ha ka klas 6 ka la ïap hadien ba u dieng uba don ha ka skul u la kyllon bad ban ïa ka. Kum shi bynta ban pynpaw ka jingsngewlem halor ka jingjia, u Myntri ka tnat pule puthi u V Sivankutty u la hukum ïa u Director of Public Education ba un tohkit bniah ha kaba ïadei bad ka jingjia bad ban phah ïa ka kaiphot hapoh ki san sngi.
