New Delhi, Naitung:
U dkhot jong ka ïingdorbar ha Rajya Sabha u Praful Patel u la pynpaw da kaba ong ba 51 ngut napdeng 54 ngut ki MLA jong ka seng ki la phah ka shithi sha u Sharad Pawar ba ka seng NCP ka la dei ban ïatreilang bad ka BJP na ka bynta ban thaw sorkar ha Maharashtra haba ka sorkar MVA ka la don ha ka tmier ban khyllem noh ha u snem ba la lah ha ka por ba pynibor pyrshah u Eknath Shinde.
Ha kaba ïadei bad kane, ka kynhun nongïalam jong ka seng NCP kam shym la lah ban shim ïa ka rai ha ka por ba biang, bad u Eknath Shinde u la ïoh ïa ka lad bad thaw sorkar bad u Devendra Fadnavis, la ïathuh ka tyllong khubor. U Patel u la ong ba ka rai ban pynïasoh bad ka sorkar Shiv Sena-BJP ka long da kawei ka jingmut, ha kaba la ong ba ka jingpyntreikam ban leit ban ïatreilang bad ka seng BJP ka la sdang ha u snem 2022.
