Bhopal, Naitung:
Ki la don kumba 8 ngut ki koidi, kiba la shah kynnoh donkti ha kiba bun ki kam beaiñ kynthup ha ka kam leh beijot bad pynïap briew, ki la lait phet na Juvenile Home kaba don ha ka nongbah Morena ha Madhya Pradesh, la ïathuh ki pulit hynnin ka sngi.
Kane ka jingjia ka la jia ha ka janmiet jong ka sngi U Blei ha ka Juvenile Home kaba don ha surok Nainagarh, la ïathuh ki pulit. Ki la don 8 ngut na ki 12 ngut ki koidi kiba dang poh rta ïa kiba dang don hapdeng ka jingshah tohkit, kynthup kito kiba leh ïa ki kam runar kiba kynthup ïa ka kam leh beijot bad ka kam pynïap briew, kiba la lait phet da kaba ki la pynpait ïa ka kynroh jong ka kamra leit bar ha ka por 7 baje janmiet ha ka sngi U Blei, la ïathuh u City Superintendent of Police u Atul Singh.
Ka kynhun pahara kaba la shah pyntreikam ha katei ka Juvenile Home ki la pyntip sha ki pulit jong ka Kotwali halor kane ka jingjia ha ka por 8 baje janmiet, ha kaba na ka liang jong ki pulit ki la pynlong ka jingleit wad ïa kine ki koidi, u la ong. Kine ki koidi kiba la lait phet ki dei ki nongshong shnong jong ka Morena, Bhind bad Sheopur distrik, la ïathuh shuh shuh u heh pulit.
