Thiruvananthapuram, Naitung:
Ka jinghap jong u slap ka la ïai bteng ha kiba bun kibynta jong ka Kerala hynnin ka sngi, ha kaba kane ka la ktah jur ïa ki skul ha kaba ki bor sorkar ki la pynbna shuti ha kiba bun ki distrik bad ki la don ruh da ki spah ngut ki briew ki bym don jaka sah shuh, naba ki ïing jong ki ki la shah pynjulor na ka jingkhyllem jong ki dieng bad na ka jingshlei um.
Kiba bun ki wah ki la kiew bad ki la pynshlei um sha kiba bun ki shnong bad kane ka la pynlong ïa ki briew ba kin mih na ki ïing jong ki bad ban leit sah sha ki jaka ba shngaiñ kiba lait na ka jingshlei um. Kumba la sakhi, la ong ba ka jingwan hap jong u slap uba jur ha ka miet jong ka sngi Balang, ka la pynjulor ïa ki spah tylli ki ïing kiba don ha ki distrik bapher bapher jong ka jylla.
Ki la don kumba katto katne tylli ki Dam kiba la pyllait noh ïa ka um, bad kine ki kynthup ïa ka Malankara Dam kaba don ha Idukki distrik. Ka India Meteorological Department (IMD) ka la pynmih ïa ki jingmaham ba ha kine ki sngi ki ban sa wan ka jinghap slap kan sa nang jur bad ki briew ki la dei ban long kiba husiar.
