Chennai, Naitung:
Ka ïingbishar ba kyrpang ba ju bishar bniah halor ki jingjia kiba long pyrshah ïa ki MP bad ki MLA, hynnin ka sngi ka la pyllait noh ïa u Myntri jong ka Tamil Nadu uba dei khmih ïa ka Higher Education bad u heh nongïalam jong ka seng DMK u K Ponmudi ha kaba ïadei bad ka jingjia jong ka jingshah kynnoh klun ïa ka jaka sorkar da kaba pyndonkam da ki kot ki sla thok.
U nongbishar jong ka ïingbishar u G Jayavel u la dep ban pynbna ïa kiba la shah kynnoh donkti ha ka jingjia ba ki la shah pyllait bad kine ki kynthup ïa u Ponmudi bad ïa kiwei pat ki 6 ngut kynthup ïa u Deputy Mayor jong ka Greater Chennai Corporation u Magesh Kumar naba la kwah ïa ki sabut kiba paw khnang ban pynshisha halor ka jingkynnoh.
Ïa ka ejahar ha kaba ïadei bad ka jingkynnoh ba la klop jaka la buh da ka Directorate of Vigilance and Anti-Corruption (DVAC) ha u snem 2003 pyrshah ïa u Ponmudi, ïa ka kiaw kurim jong u kaba la khlad noh mynta ka P Saraswathi, ïa u Magesh Kumar bad ïa kiwei pat.
