Dehradun, Naitung:
Kum shi bynta ban bteng ïa ka jingpyntreikam ban ïaleh katba lah ban ïada ïa ki nongshong shnong na ka jinghiar ka khyndew ha Joshimath, ka sorkar jylla ka la rai ban pynshna biang ïa kumba 984 tylli ki ïing kiba la orpait bad tor hadien ba la dep ban pynlong ïa ka jing-leit jurip bniah.
Kine baroh ki ïing ki la shah buh ha ka bynta jong ka ‘Yellow Category’. Ka sorkar ka la sdang ïa ka jingpyntreikam na ka bynta ban jied ïa ka kompeni ka ban lah ban trei ïa kane ka kam bad ban pynskhem biang ïa ki.
“Ïa ka kynhun jong saw ngut ki dkhot la lah ban thaw ha ka jingkhmih jong u Secretary Disaster Management, u Dr. Ranjeet Kumar Sinha”, la ïathuh u nongaiktien ha ka jingïakren bad ki nongthoh khubor.
Ka jingngam jong ka khyndew ha Joshimath ka la sdang ha basdang jong u bnai Kyllalyngkot jong une u snem.
Naduh kane ka por ka jinghiar ka khyndew ka la nang ïai bteng da bun bun sngi.
Kumba la sakhi, la ong ba ka Joshimath ka la ïoh pdiang ïa ka jinghap jong u slap uba jur bha haba ïanujor bad kiwei pat ki jaka ha ka jylla ha ryngkat ka jingjur jong ki jingtwa khyndew bad ka jingor pait jong kiba bun ïing bad ki jingtei, ha kaba la lap ruh ïa kawei ka thliew kaba dang thymmai ha kaba kane ka la pyntieng pynsyiee ïa ki nongshong shnong.
Kumba la sakhi, la ong ba la lap ïa kawei ka thliew kaba jylliew kumba 6 phut ha kawei ka jaka ha Joshimath kaba don ha Chamoli distrik jong ka Uttarakhand.
Ka jingïai bteng jong ka jinghap slap ka la ktah jur ïa ka mariang ha kiba bun ki jaka ha Chamoli distrik ha kaba ki la mih shibun ki jingtwa khyndew bad ki jingor pait jong ki ïing.
Kane ka la long khyndiat bnai hadien ba la don bun tylli ki ïing ha Joshimath kiba la khyllem bad orpait bad la lap ruh ha ki surok bad ha ki shnong ba la ïohi ïa ka jingnang ngam jong ka khyndew.
“Haduh mynta dang ïoh jingtip ba ki dang don ki ïing kiba la orpait, ha kaba ka jingshna ïa kine ki ïing kan sa sdang hadien ka aïom slap”, la ong u nongaiktien.
Ïa ka kaiphot Post Disaster Need Assessment (PDNA) la pynkhreh da ka National Disaster Management Authority na ka bynta ban shna ïa ki ïing ha Joshimath. Ki rukom julor jong ki ïing yn sa buh ha ki bynta bynta katkum ki rukom julor la ka long bun ne khyndiat.
