Shillong, Naitung 07:
Ka Sports Cell jong ka KSU ka la pynpaw ka jingsngewkmen bad jingsngew sarong halor ka jingshah jied u Bah Donald S. Wahlang kum u Vice President jong ka Basketball Federation of India.
“U Bah Donald u dei ruh u General Secretary ka Meghalaya Basketball Association (MBA) bad ka jingithuh bad pdiang ka BFI ïa une u rangbah kum u Vice President ka pyni shai sha baroh halor ka jingtbit ka jong u ban pyntyllun ïa ki kam kiba ïa dei bad ka basketball ha Jylla bad ha India baroh kawei,” la pynpaw kat kum ka kyrwoh ba la pyllait da u Eric A. Nongkynrih, Sports Secretary ka seng Khasi Students’ Union.
Te kumta na ka liang ka KSU ka ai khublei kyrpang ïa u Bah Donald halor ka jingwanrah burom bad nam ïa ka Jaidbynriew Khasi baroh kawei bad ka kitbok kitrwiang ïa u ba un lah ban pyntyllun pura bad janai ïa ka kam ba thymmai ba la bynshet ha u da ka BFI.
