Nongpoh, Naitung 07:
U Myntri Rangbah ka Jylla, Conrad K Sangma ha ka Sngi Thohdieng u la plie ïa ka ‘Meghalaya Rafting’, kaba dei kawei na ki jait jingïalehkai king-lieng ha Whitewater Village ha ka shnong Umtham kaba ha Ri Bhoi District bad ka jingthmu jong kane ka long ban kyntiew ïa kane ka jait jingïalehkai hapoh ka Jylla.
Ka Ri Bhoi Water Sports and Tourism Cooperative Society lem bad ka Meghalaya Canoe Association mynta la bun snem ki la don bynta ban kyntiew ïa kane ka jait jingïalehkai hapoh katei ka shnong Umtham ryngkat ka jingïadon bynta lang ka Sorkar Jylla.
Ha katei ka jaka la pynlong ruh ïa shibun ki jingïakob kiba dei ha ka kyrdan National bad International kumjuh. Ha u snem ba la dep la pynlong ruh ïa ka Megha Kayak Fest kaba la wan shim bynta da ki nongïalehkai na kylleng ka pyrthei.
Ha kane ka jaka la ai jinghikai ruh ïa ki samla kynthei bad shynrang bad kumjuh ïa ki heprit ban pyntbit na ka bynta katei ka jait jingïalehkai bad ki don ruh kiba la leit ïashim bynta ha ki jingïakhun kiba dei ha ka kyrdan National bad International. Na ka liang ka Ri Bhoi Water Sports and Tourism Cooperative Society ka don ruh ïa ka jingthmu ban pynlong bad pynbha ïa katei ka jaka kum kawei na ki jingïakhun (slalom) kaba pawnam tam ha ka pyrthei.
Haba ai jingkren ha kane ka sngi, u Conrad u la ai jingïaroh ïa ki nongïalam jong ka Ri Bhoi Water Sports and Tourism Cooperative Society lem bad ka Meghalaya Canoe Association kiba don bynta ban kyntiew ïa kane ka jait jingïalehkai (rafting) bad canoeing ha ka Jylla. U la kular ruh ba na ka liang ka Sorkar Jylla kan ai jingkyrshan pura ban kyntiew ïa katei ka jait jingïalehkai.
U la ong ruh ba ka Sorkar Jylla ka ngeit skhem ba lyngba kane ka jait jingïalehkai, kan kyntiew ïa ki samla ka Jylla bad ruh kan khring ïa ki jingithuh jong ka pyrthei. Kumta na ka liang ka sorkar kan ïaleh katba lah ban pynbit pynbiang ïa kane ka jaka bad ban thaw kum kawei na ki jaka jngoh kai ha katei ka jaka.
Ha kaba ïadei bad ka jingbymbiang ka ‘network mobile’ ha katei ka jaka, na ka liang u Sangma u la kular ruh ban shim khia halor kane ka bynta. Nangta u kyrmen skhem ruh ba kane ka jaka kan long kawei na ki jaka ba pawnam ha ka pyrthei ha ki sngi bad ki snem ki ban wan.
Ha kane ka sngi la ïadon ryngkat ruh da ka MDC jong ka Umsning, Kong Macdalyne Sawkmie Mawlong, ka Director jong ka tnad Sports & Youth Affairs, Kong Isawanda Laloo, u Deputy Commissioner ka Ri Bhoi, u Arpit Upadhyaya, u Superintendent of Police ka Ri Bhoi, u Giri Prasad, ki ophisar bad nongïalam na ka Ri Bhoi Water Sports and Tourism Cooperative Society lem bad ka Meghalaya Canoe Association.
