Shillong, Naitung 07:
Ka Apex Council jong ka BCCI ha ka sngi Thohdieng ka la mynjur ïa ka jingleit ïashim bynta ka kynhun ïalehkai kriket jong ki rang bad ki ‘thei na ka bynta ka Asian Games ka ban long ha Hangzhou ha u Nailur-Risaw mynta u snem.
Ka kynhun ïalehkai (second-string) jong ka ri kan leit ïashim bynta ha ka lympung ïalehkai ki shynrang ka ban sdang naduh 28 tarik u Nailur, katba ka kynhun (full-strength) jong ki kynthei kan ïashim bynta ha katei ka lympung ka ban sdang naduh 19 tarik u Nailur.
Ïa ka jingïalehkai kriket la pynlong tang lai sien ha ka Asian Games bad ia kane ka jingialehkai la pynlong khatduh eh ha ka Incheon ha u 2014 ha kaba ka India kam shym la leit ïashim bynta.
Kane ka lympung ka la buh jingeh bha ïa ka kynhun ïalehkai namar ka India kan pynlong ia ka ODI World Cup naduh 5 tarik u Risaw.
Na ka liang ka BCCI ka la pynpaw ba kan long kaba eh ban sei ïa ka kynhun ïalehkai ka ban ïashim bynta ha ka Asian Games, hynrei ban noh synñiang ka long kaba kongsan. Ka India ka lah ban don jingkyrmen ban khur ïa ka takma ksiar ha ka kynhun ïalehkai ki shynrang bad kynthei.
