Bengaluru, Naitung:
Ki la don baroh kumba 44 ngut ki nongñiah kali ar shaka kiba la shah pynngat ha ki kyndon jong ka aiñ haduh ka sngi Ba-ar halor ka jingpynher sted jong ki ïa ki kali ha ka surok bah Bengaluru-Mysuru Expressway, la ong u Additional Director General of Police (traffic and safety) jong ka Karnataka u Alok Kumar.
Ki pulit jong ka Ramanagara ki la pynlong ïa ka jingpyntreikam ban khmih bniah ïa ki rukom ñiah kali ha ki surok bah ha kaba la pynngat ha ki kyndon jong ka aiñ ïa kito kiba pynher sted palat pud ïa ki kali ba ki ñiah.
Naduh ba la plie paidbah ïa ka ha u Lber, ka surok bah Bengaluru Mysuru Expressway ka la paw pyrthei lyngba ki khubor ba la don shibun ngut ki briew kiba la ïap na ki jingjia ïatakhuh kali. Kumba la ïathuh ka kaiphot, la ong ba ki la don baroh kumba 58 ngut ki briew kiba la ïap bad 147 ngut kiwei pat kiba la mynsaw ha kane ka surok bah hapdeng ka 1 tarik, Kyllalyngkot haduh ka 25 tarik, Jylliew ha une u snem.
Ki pulit ki la khmih bniah ïa ki jaka ba ju kham jia khah khah ki jingjia aksiden bad ha kum kine ki jaka la buh ka jingmaham bad pynidak ba la dei ban pynsuki ïa ki kali.
