Khliehriat, Naitung 09:
Ka Rymbai Presbyterian Higher Secondary School, Khliehriat HSS bad KB Memorial Secondary School ki la long kum ki lahduh ha ka lympung District Level Inter-School Subroto Mukherjee Cup Football Tournament kaba la pynïaid da ka shlem treikam ka District Sports Officer, East Jaiñtia Hills District.
Kane ka jingïoh rah ïa ka nam lahduh ka la wan hadien ba kine ki skul ki la jop ïa ka jingïakhun final ha ka sngi Saitjaiñ ha madan ïalehkai ka East Jaiñtia Hills District Sports Association ha Dienchynrum.
Haba phai sha ka jing-ïakhun final U-17 Boy’s, ka Rymbai Presbyterian Higher Secondary School, kala jop da 2-1 kol ïa ka Wapung Higher Secon-dary School katba ha ka U-17 Girl’s ka Khliehriat Higher Secondary School kala jop da 1-0 kol ïa ka Lotus Secondary School, Dienchynrum.
Ha ka jingïakhun jong ki khynnah ha ka Under-14 Boy’s, ka KB Memorial Secondary School, Wapung ka la pynliem noh ïa ka Chiehruphi Secondary School lyngba ka jingïashut tie breaker kata da 3-1 kol.
Da kane ka nam jop, kine ki skul mynta kin ïoh ban mihkhmat ïa ka East Jaiñtia Hills District sha ka State Level ka ban long ha une u bnai.
Ka khunsam ‘Best Player’ la ïoh rah da u Bisterly Ksih na Rymbai Presbyterian Higher Secondary School ha ka Under-17 Boys, ka Filicia Sympli na ka Khliehriat Higher Secondary School na ki kynthei Under-17 bad u Lyonel Ryngkhlem jong ka KB Memorial Secondary School u la ïoh ïa ka nam Best Player na ki Under-14 Boy’s.
U kongsan ba wan sakhi ïa kane ka jingïakhun final ha kane ka sngi u dei Deputy Commissioner jong ka East Jaiñtia Hills District u Abhilash Baranwal, IAS, ha ryngkat u kapten ka kynhun Under-20 jong ka India u Halen Nongtdu kum u nongshah khot sngewbha ba kyrpang ban ai mynsiem ïa ki khynnah ïalehkai.
Kiwei kiwei past kiba la ïadonlang ha kane ka sngi ki kynthup ïa u Bah Finelyness Bareh, MDC Rymbai-Khliehriat, District Sports Officer, ka Kong Stephanie Rapsang, C Tlang, General Secretary, East Jaiñtia Hills District Sports Association bad Bah James Sutnga, Working President jong ka East Jaiñtia Hills District Football Association.
