Shillong, Naitung 09:
Ka Rangdajied United Football Club, ka Nangkiew Irat Sports Club, ka Mawlai Sports Club bad ka 4th Mile Kick Start Academy ki la khur ïa ka jingjop ha ki jingïalehkai jong ka lympung SSA Under-14 Football League 2023 kaba la long ha ka sngi Saitjaiñ.
Haba phai sha ka jingïalehkai kaba nyngkong kaba la long ha ka por 11 baje mynstep, ka Rangdajied United ka la lah ban pynliem noh ïa ka Mylliem Sports Club da 3-0 kol. Ïa kine ki kol jong ka Rangdajied United la ïoh ban thep marwei da u Roderick Khongjee ha ka minit ba 55, 58 bad 60.
Ha ka jingïalehkai kaba ar, kaba la long ha ka por 12.30 mynsngi, ka Nangkiew Irat Sports Club ka la lah ban pynliem noh ïa ka Madanryting Sports Club da 4-0 kol. Ïa kine ki kol jong ka Nangkiew Irat la ïoh ban thep da u Zaniel Kurbah ha ka minit ba 19, u Richmond Jiengap ha ka minit ba 37 bad 44 bad u Habankara Blah ha ka minit ba 40.
Haba phai pat sha ka jingïalehkai kaba lai, kaba la long ha ka por 2.30 mynsngi, ka Mawlai ka la lah ban pynliem noh ïa ka Laitkroh Sports Club da 2-1 kol. Ha kane ka jingïalehkai dei ka Laitkroh kaba la thep kol nyngkong lyngba u D Lyndem tang ha ka minit kaba 2, hynrei ha ka minit kaba 6 ka Mawlai ka la ïoh ban pynphai lyngba u AE Nengnong bad dei ha ka minit kaba 59 ba u M Nongkhlaw u la ïoh ban thep ïa ka kol jong ka jingjop.
Haba phai pat sha ka jingïalehkai kaba khatduh jong kane ka sngi, ka 4th Mile Kick Start Academy ka la ïoh ban shu khur ei ïa ki 3 tylli ki kol bad ki 3 point pura khlem da donkam ban hiar madan, hadien ba ka kynhun ba dei ban ïakhun pyrshah ka Challenger Academy kam shym la wan satia ban pyntip ne ban don na ka bynta kane ka jingïalehkai.
