Shillong, Naitung 09:
Ka West Khasi Hills District Chess Association (WKHDCA) ka la pynlong ïa ka 9th WKHDCA State B & Inter School Chess Championship 2023 ha ka 8 tarik mynta u bnai ha SGSY C&RD Block Nongstoi?4.
Ïa kane ka lympung la wan ban plie da u ADC ka West Khasi Hills u Bah Velentine Swer, MCS. U kongsan haba ai jingkren plie u la kyntu ïa ki nongïashim bynta ba ki dei ban don ka thong ban poi ha ka kyrdan ba hajrong duh ym tang ban shu kut noh tang shiteng.
U la kyntu ruh ba dei ban kiar na ki jingbam jingdih ba pynsniew ïa ka met khnang ban long kiba koit bad ban pynleit jingmut bha khnang ban khlaiñ ka jingmut jingpyrkhat.
Ïa kane ka jingïalang plie la pynïaid da u President ka Association Bah Richard Sun hapdeng ka jingïadon lang ki para dkhot, ki nonghikai, ki kmie ki kpa, ki nongïalehkai ha ka open bad ki khynnah skul na ki 6 tylli ki skul ba pawkhmat jong ka District.
Ki nongjop ha ka Under-12 Boys ki long, ba nyngkong Meshwa Syiemlieh na JNV Nongstoiñ, ba-ar u Kyrpang Sangriang bad ba-lai u Raimankupar Jyndiang na Anderson HS School Nongstoin.
Ha ka Under-15 Boys, ïa ka kyrdan ba nyngkong la ïoh da u Brian CJL Marshillong na JNV Nongstoiñ, ka kyrdan ba ar sha u P Dakerhime Lyngdoh na Anderson HS School Nongstoiñ bad kyrdan ba lai sha u Canbeljone Wanniang.
Ha ka Under-18 Boys ïa ka kyrdan ba nyngkong la ïoh da u Sambor Jyrwa, ka kyrdan ba-ar ka la leit sha u Arwandame Thongni bad ka kyrdan ba-lai sha u Hawamanbha Phyrngap.
Kiba la ïoh ïa ka kyrdan kaba nyngkong ha ka kyrdan Under-18 Girls bad Women Open category ki long ka P Sarasaphi Lyngdoh na St Anthony’s bad ka Gavy Jones L Marshillong na Nongstoiñ College.
Ïa kane ka lympung la long Chief Arbiter da u Bah Bonney Kharbani, SNA bad la pynïaid da ka Swiss System ba 5 kylla. La jied ruh 6 ngut ki nongïalehkai ba jop hakhmat duh ban leit sha ka State Level Chess Tournament ka ban long ha Ribhoi District ha ka 21 bad 22 tarik mynta u bnai. Bad 4 ngut ki nongjop ba hakhmat duh na kane ka lympung kin leit sha ka National Chess Championship kaban long ha Maharashtra ha u bnai Nailar 2023.
Haba pynkut noh ïa kane ka lympung la ïoh ban sam ïa ki khusnam, ki trophy bad syrnod sha ki nongjop ha ka jingïadon lang u EE jong ka PWD (R) Nongstoiñ Bah F Sohlang kum u Kongsan uba la noh synñiang bad ai ruh ka jingkren ban nang pynkhlaiñ shuh shuh ïa ka jinglehkai ha ka District bad ka Jylla baroh kawei.
