Shillong, Naitung 09:
Ka England ka la ïoh rah ïa ka nam lahduh jong ka lympung European Under-21 Championship ha ka sien nyngkong eh kaba la wan hadien ka jingïaid lynti jong 40 tylli ki snem. Kane ka jingïoh rah ka England ka la wan ruh lyngba ka jinglah jong u James Trafford ban kyrda ïa ka penalty ha ka minit ba khatduh eh jong ka jingïalehkai, kaba la pynlong ïa ka England ban jop da 1-0 kol ïa ka Spain.
U Trafford, uba la pynkhreh ban pynïasoh noh sha ka Burnley na ka club Manchester City ha ka jingsiew kaba lah ban kot sha ka £19m, u la lah ban kyrda ïa ka bol kaba la shut da u Abel Ruiz ha ka minit kaba 99, ka penalty kaba ka Spain ka la ïoh hadien shi slem ba la peit bniah lyngba ka VAR.
Ka shi kol kaba ka England ka la ïoh bad kaba la dei ruh ka kol jong ka jingjop ïa ka nam lahduh ka la wan ha ka minit ba khatduh jong ka kylla step, hadien ba ka bol ba la shut Free-Kick da u Cole Palmer ka la leit dei na ka bynta ka kjat jong u Curtis Jones bad rung jlang shapoh ka kol.
Watla ka Spain, kaba la khyrwit haduh 13 tylli ki kol ha kane ka lympung, kam shym la lah pat ban ïoh pynphai kol, watla ka kol ba la thep da u Ruiz, ha ka kylla miet, ka la shah pyndam noh namar ka ‘offside’ bad ka jingbym lah thep kol, ka la pynlong ruh ïa ka England ban nym shah thep wat tang shi kol ha kane ka lympung.
Kane ka jingjop kan pynlong ruh ïa kane ka kynhun kaba lai ha England ban jop ïa kane ka lympung, kata hadien ba ka la jop ha u snem 1982 bad 1984.
