Shillong, Naitung 09:
Ka Sri Lanka ka la ïoh rung sha ka lympung World Cup hadien ba khur jingjop ha ka jingïakhun pyrshah ïa ka Netherlands ha ka final jong ka 2023 Cricket World Cup Qualifier kaba la long ha Harare Sports Club, Zimbabwe ha ka sngi u Blei.
Ka jinglah jong u nongkawang bol u Maheesh Theekshana ban khur haduh 4 wiket bad ai 31 run, ka la pynlong ïa ka Sri Lanka ban jop ïa ka Netherlands da 128 run ha ka final.
Kite baroh ar tylli ki kynhun ki la ïoh rung sha ka lympung World Cup ka ban long ha India naduh ka 5 tarik Risaw haduh 19 tarik Naiwieng, hynrei ka Sri Lanka kan mih mynta na Zimbabwe ryngkat ka khusnam lahduh, hadien ba ka la jop baroh phra tylli ki jingïalehkai ha katei ka lympung.
Haba phai sha ka jingïalehkai, ka Sri Lanka kaba la tied nyngkong ka la kamai tang 233 run bad hap lut ki wiket na ki 47.5 over bad dei tang u Sahan Arachchige uba la tied marwei 57 run.
Haba beh ïa katei ka thong, ki nongtied ka Netherlands naduh kaba sdang ki la mad jingeh bad hap lut ki wiket tang na ki 23.3 over hadien ba ki la kamai 105 run.
“Ka thong kaba nyngkong ka long ban ïoh rung sha ka lympung World Cup, kaba ngi la lah, ka thong kaba ar ka long jop ïa kane ka lympung, bad ïa kaba ngi la lah ban leh. Kumta mynta ngin leit phai ïing da ka jingkmen,” la ong u Coach ka Sri Lanka u Chris Silverwood.
