New Delhi, Naitung:
Katkum ka jingkhmih bniah kaba thymmai hapoh ka ri, la ong ba ha palat mar shiteng ki nongbah, ki nongshong shnong ki la shah ktah jur na ka daw jong ka jingshlei um ha ki lynti ki synkien.
Ki nongshong shnong ki la hap shu pynlut kai ïa ka por, ka bor bad ki mar ki mata.
Ka jingshlei um ha ki lynti ki synkien ki la pynduhnoh ïa ka por ha ka ban leit trei, ka jingpynjulor ïa ki jingdon-jingem, ka jingpynlut por ha ka ban shong kali bad ngat ruh ha ki jingjia ïatakhuh kali.
Ka jingwadbniah ka la pynpawshai ba ha ki thaiñ sor kiba don ha kylleng ka ri, la shem ba kiba bun ki la ïakynduh jingeh na ka daw ka jingdap um jong ki lynti ki synkien bad ka jingshlei um.
Shuh shuh la ong ba la sakhi ba kine ki jingjurjong ki jingshlei um ha ki lynti ki synkien ka ju long hadien ka jinghap jong u slap uba jur.
Ka jingkhmih bniah ba la leh da ka Community Social Media platform, Local Circles jong ka ri, ka la pyni ba ki la don kumba 94 per cent ki nongshongshnong kiba la don ha ki nongbah kiba la shah ktah ha ki jingshlei um ki lynti ki synkien ha kane ka aïom lyiur.
Kane ka kynhun kaba la pynlong ïa ka jingwad bniah, ka la ong ba ka la ïoh ban pdiang ïa palat 22,000 tylli ki jubab halor ki jingbuh jingkylli na ki nongshong shnongkiba don ha ki 293 tylli ki distrik.
