Kolkata, Naitung:
Ar sngi hadien ka ilekshon Panchayat ha West Bengal ka la mih ka jingïakynad ha kaba mynta sa kawei pat ka jingïakynad ka la mih ha Cooch Behar hashwa ban pynlong biang ïa ka ilekshon ha ki 696 tylli ki jaka thep vote kiba don ha kylleng ki 19 tylli ki distrik jong ka jylla kaba la long hynnin ka sngi.
Ha kaba ïadei bad kane ka jingjia, na ka liang ka seng Congress ka la pynshisha ba ki nongbud jong ka seng kaba bat ïa ka jingsynshar ka Trinamool Congress ki la leit ban pynjulor ïa ka ïingsah jong uwei u nongbud jong ka seng.
Ki runar ki bym shym la lah ban ithuh ki la leit ban thombor ïa ka ïingsah jong u kyrtong ka seng Congress u Noornahar Bibi, ha kaba ka la don ka jingkawang bom bad ïasiat ha ka miet jong ka sngi U Blei.
Kane ka jingjia ka la pynkhie bitar ïa ki nongkyrshan jong u kyrtong bad nangne ka jingïakynad ka la nang jur bad ïai bteng sa sha kiwei pat ki bynta ha kaba na ka liang ki bor pahara ki la pynjur ki jingpyrkhing.
Ïa ka jingpynlong biang ïa ka jingthep vote la hukum ban pynlong biang ha ki 53 tylli ki jaka thep vote jong ka Cooch Behar distrik hadien ka jingmih jong ka jingïakynad kaba jur bad ka jingpynïap briew ha ka por ba don ka ilekshon Panchayat.
Ka jingpynlong biang ïa ka jingthep vote ka la long ha ki 89 tylli ki jaka thep vote kiba don ha Nadia, North 24 Parganas (46), Uttar Dinajpur (42), South 24 Parganas (36), Purba Medinipur (31) bad Hooghly (29), la ïathuh ki heh ba dei khmih.
Ïa ka jingpynlong biang ïa ka ilekshon la pynlong da ka State Election Commission (SEC), kaba la sdang naduh ka por 7 baje mynstep haduh ka por 5 baje ha ryngkat ka jingpynkhlaiñ ïa ki bor pahara ha kylleng ki jaka.
