New Delhi, Naitung:
Ka Supreme Court hynnin ka sngi ka la pynjlan shuh shuh haduh ka 24 tarik, Naitung ban pyllait jamin shipor ïa u Myntri barim jong ka Delhi u Satyendar Jain na ka bynta ki jingphah sumar jong u ha kaba ïadei bad ka jingshahkem halor ka jingshah kynnoh kamai ïa ka spah bymhok, ïa kaba la tohkit da ka kynhun Enforcement Directorate.
Ka kynhun nongbishar jong u Justice A S Bopanna bad u Justice M M Sundresh ka la hukum ïa u Senior Advocate u Abhishek Singhvi, uba la mihkhmat na ka bynta u Jain, ba un phah ïa ka kaiphot ha kaba ïadei bad ki jingsumar sha u Additional Solicitor General S V Raju.
Ha ka por ba la pynlong ïa ka jingbishar kaba bniah, u Singhvi u la ong ba lai tylli ki Hospital ki la ong ba la dei ban leh Surgery ïa u Jain.
Ka ïingbishar bahakhlieh ruh ha ka 26 tarik, Jymmang ka la pyllait jamin shipor ïa u Jain da kumba 6 taïew ha kaba ïadei bad ki jingphah sumar ïa u, ha kaba la ong ba u nongshong shnong jong kane ka ri u la don ka hok ban ïoh ïa ki jingsumar katkum ka jingkwah jong u ha ki jaka ai jingsumar jong ki riewshimet ha kaba un hap ban pynlut hi.
Ka kynhun ED ka la kem ïa u Jain ha ka 30 tarik, Jymmang jong u snem ba la lah halor ka jingkynnoh ba u la donkti ban kamai ïa ka spah bymhok lyngba ki saw tylli ki kompeni kiba don ka jingïadei bad u.
Ka kynhun tohkit, ka la kem ïa u Jain hadien ka jingmudui ejahar jong ka kynhun CBI pyrshah ïa u ha u snem 2017 hapoh ka jingtreikam jong ka Prevention of Corruption Act.
