Srinagar, Naitung:
Ïa ka Amarnath Yatra la pynsangeh ha ka sngi kaba saw kaba long hynnin ka sngi namar ka jingshah khang lynti ka surok bah Jammu-Srinagar. Ha kaba ïadei bad kane, ki la don kumba 15,000 ngut ki nong-leit ïaid riewblei kiba la sahkut lynti ha Jammu bad ha kiwei pat ki jaka.
Ki la don palat 6,000 ngut ki nongleit ïaid riewblei kiba la sahkut lynti ha Jammu, khamtam ha ka jaka sah jong ki kaba don ha Bhagwatinagar katba palat 5,000 ngut ki la sahkut ha ka jaka sah jong ki kaba don ha Chanderkot ha Ramban distrik ha ka lah sngi U Blei. “Ïa ka Yatra la ïai pynsangeh na Jammu namar ka jinglong jingman ha ka surok bah. Ym shym la shah ïa ka kynhun kaba thymmai ban ïaid riewblei sha Kashmir na ki jaka sah jong ki ha Jammu hynnin ka sngi,” la ong u heh pulit ha ka jingïakren bad ki nongthoh khubor.
”Ki la don bun ngut ki nongleit ïaid riewblei kiba la poi ha Jammu na ka jingïaid lynti jong ki sha Amarnath. Hynrei kiba bun na ki ki la hap ban sah ha kiba bun ki jaka ba la buh,” u la bynrap. Ki la don kumba katto katne ngut ki nongleit ïaid riewblei kiba la sah ha Lakhanpur bad Chichi Mata ha Kathua bad ha Samba distrik khnang ban lait pynbun paid ha Jammu, la ong ki heh pulit.
