Mumbai, Naitung:
Ki pulit jong ka Pune ha ka sngi Ba-ar ki la kem noh ïa uwei u briew uba la 24 snem ka rta halor ka jingbyrngem ban pynïap ïa u nongïalam jong ka seng NCP bad u Myntri jong ka Maharashtra u Chhagan Bhujbal, ïa uba dang shen u la shah pynrung dkhot ha ka kynhun Myntri jong u Eknath Shinde.
Une u briew u la phone ha u Personal Assistant (PA) jong u Bhujbal, ha ka miet jong ka sngi Ba-ar ha kaba u la ong ba u la ïakut bad ainong ban pynïap ïa u. Une u briew uba la phone ïa uba la pynithuh ïalade kum u Prashant Patil, u la phah ïa ka khubor byrngem sha u PA jong u Bhujbal, u Gaikwad, katba u Chhagan Bhujbal u dang don ha ka thaiñ Pimpri-Chinchwad. Hadien kane, ka la don ka jingbuh jingujor pyrshah ïa une u nongbyrngem.
