Srinagar, Naitung:
Ki pulit jong ka Jammu & Kashmir ki la kem ïa 10 ngut ki briew ha kaba ïadei bad ka jingjia jong ka jingïasuhbuit jong ki ban pynkhie-im biang ïa ka kynhun Jammu Kashmir Liberation Front (JKLF), kaba dei ka seng kaba la shah ñiew beaiñ, bad ïa ka Hurriyat.
Ïa kane ka jingjia la pynngat hapoh ka kyndon 10 bad 13 jong ka Unlawful Activities Prevention Act bad ka kyndon 121A jong ka Indian Penal Code ha ka jaka treikam jong ki pulit ka Kothibagh.
Kine ki briew kiba la shahkem ha ryngkat kiwei pat kiba la ïadonktilang, ki la thmu ban pynkhie-im biang ïa kine ki seng da ka hukum jong ki lehnoh kiba na Pakistan, la ïathuh ki pulit.
Ka jingthoh ba la phah sha ki lad phah khubor da ki pulit jong ka Jammu & Kashmir ka la ong ba na ka jingpynlong ïa ka jingtohkit kaba hashwa halor kane, la lap ba kine ki briew kiba la shahkem ki la don bynta ban ïatreilang bad ki kynhun ba shabar ri.
Ki la don kumba katto katne ngut napdeng jong ki kiba dei ki dkhot jong ki kynhun ki bym da paw pyrthei shuh kum ka Kashmir Global Council, ba la khlieh da u Farooq Siddiqui, bad u Raja Muzaffer jong ka JKLF, la ïathuh ka jingthoh.
Halor kane ka jingthmu, kine ki briew ki la pynlong da ka jingïalang ban ïakren halor kane ka mat ba ïadei bad ka jingthmu ban pynkhie-im biang ïa kine ki seng.
Na ka jingpynlong ïa ka jingtohkit kaba hashwa, la tip ruh ba kum kane ka jingïalang ka la long ruh ha ka 13 tarik, Jylliew ha kaba la leit ban ïashim bynta da kiba bun ki dkhot, la bynrap shuh shuh ka jingthoh ba la phah.
Ïa kine ki briew kiba la shahkem la tip kyrteng kum u Mohammad Yaseen Bhat jong ka Nigeenbagh, Sgr, Mohammad Rafiq Pahloo na Natipora, u Shams u din Rehmani na Lalbazar, Jahangeer Ahmad Bhat na Batengo, Sopore, Khurshid Ah Bhat na Rawalpora, Shabir Ah Dar na Badamwari Sopore, Sajad Hussain Gul na Panthachowk, Srinagar, Firdous Ah Shah na Abiguzar, Srinagar, Parray Hassan Firdous na Lawaypora, Srinagar, bad u Sohail Ahmad Mir na Peerbagh, Budgam.
