New Delhi, Naitung:
Ka Supreme Court ha ka Lah Sngi U Blei ka la mynjur na ka bynta ban bishar bniah ha ka 31 tarik, Naitung, ha kaba ïadei bad ka jingkyrpad jong u Uddhav Thackeray pyrshah ïa ka hukum jong ka Election Commission ban ai ka kyrteng ïa ka seng ka “Shiv Sena” bad ïa ka shap jong ka da ka ryntieh bad u khnam sha ka kynhun ba la lamkhmat da u Eknath Shinde.
Ka kynhun nongbishar jong u Chief Justice DY Chandrachud bad u Justice PS Narasimha ka la ong ba ïa kane la buh ha ka thup ban ïoh ban bishar bniah hadien ba u Advocate Amit Anand Tiwari un pan jingbit na ka bynta ban ïoh ban bishar kham kloi. “La buh ba ha ka 31 tarik, Naitung, ngin sa bishar bniah”, la ong ka kynhun nongbishar bad ai jingbit ïa u Tiwari ba un phah ïa ka jubab ba la buh da ka kynhun u Shinde. Ka ïingbishar bahakhliehduh ka la pan jubab na u Shinde halor kane ha ka 22 tarik, Rymphang.
