Shillong, Naitung 13:
U Bah Commander Shangpliang uba dei uwei na ki nongshna phlim ha ka jylla bad uba la pynmih ïa ka phlim Khasi kaba ai kyrteng Khyndai Lad, u la pynpaw ka jingsngewsih ban ïohi ba ki bor district kin phah khang ïa ki dukan naduh 10 baje mynmiet ha Khyndai Lad kaba dei ka jaka pdeng jong ka sor Shillong.
U la ong ka jingdon kiba shong dukan ha ka por mynmiet ka la ïarap ïa kiba wan jngohkai pyrthei kiba wan na Sohra, Dawki bad kiwei ki jaka namar ki ïoh ka bam shwa ban leit thiah ha ki ïing basa (hotel).
U la ong lada khang noh ïa ki dukan naduh 10 baje mynmiet ha Khyndai Lad ka sor Shillong kan sa long kum ka nongkyndong.
Kumta u la kyntu ïa ka sorkar haba shim rai dei ban da puson bha khnang ban nym ktah ïa kiba bylla jakpoh bad ïa kiba wan jngohkai pyrthei.
Shuh shuh u la ïathuh ba ka jingshna ïa ka phlim Khyndai Lad ka don ruh ïa khana sha lyndet, hynrei kane kam thew ïano ïano, pynban ka wanrah ruh ïa ka jinglong jingman jong ka Khyndai Lad kaba ki briew ki im man ka sngi bad man ka miet.
U la pynkynmaw ha ka por ba ringdur ïa ka phlim Khyndai Lad haduh 1 baje mynstep haba ki thngan ki ïoh ban bamja namar ki dang don kiba die ja ha surok.
Nalor kane, u la ïathuh ruh ba mynta wat ha Laitumkhrah ki la don kiba die dukan ha ka por mynmiet. Kane ka la nang wanrah shuh shuh ïa ka jingshngaiñ bad kyntiew ïa ka kamai kajih jong u briew.
Nalor kata, u la ong kam lah ban long ba jia ha kiwei ki jaka yn leit khang dukan ha Khyndai Lad, hynrei dei ban pynbiang da ki bor pulit keiñ ba kin shngaiñ ki nongshong dukan.
Namar kata, u la ai jingmut ba ha Khyndai Lad la dei ban don noh ka jaka shangkai ha ka por mynmiet bad dei ban kem ïa ki briew kiba pynkulmar shnong.
