Shillong, Lber 28
U Myntri Rangbah ka Assam, Himanta Biswa Sarma, u la ong ba na ka liang ka Sorkar Assam ka thrang ban pynbeit noh kloi ïa hynriew tylli ki jaka khappud bad ka Jylla Meghalaya kiba ym pat shym la dep ban pynbeit satia.
“Ki don sa hynriew tylli ki jaka ba ïakajia, lai tylli na kine hynriew tylli ki jaka ki dei kiba ngi lah ban pynbeit ha kano-kano ka por. Nga tharai ba ka Sorkar Meghalaya ka ap syndon ban pynbeit lang ha kajuh ka por bad lai tylli kiwei pat”, la ong u Himanta ha ka Sngi Thohdieng ba u wan kum kongsan ha NEPA.
U la ong ka kam ka dang ïaid bad baroh ar Jylla kin bteng ban trei ïa ka kam ban pynthikna ba lah pynbeit noh ïa ki khappud.
Haba kylli, u Myntri Rangbah ka Assam u la ong ba ha kane ka jingpynbeit pud ka don ruh ka jingktah ïa ka jingsngew ki nongshong shnong jong baroh ar Jylla, kumta ban buh ïa ka por lano ban pynbeit noh kam long kaba bha hynrei hap ban kyrmen ba yn lah ban pynbeit noh kloi.
“Ha kane ka kam ka don ka jingktah ruh ïa ka jingsngew ki paidbah jong baroh ar. Kumta, ban buh por kam long kaba bha, hynrei ha kajuh ka por ngi kyrmen bad ngeit ba ngin lah ban pynbeit”, u la ong.
Ha kaba ïadei bad hynriew tylli ki jaka ha khappud jong ki ar Jylla ba la dep ban pynbeit bad soi ïa ka soskular Memorandum of Understanding (MoU), u Himanta u la ong ba ka Survey of India ka la leh ïa la ka kamram ban phiah ïa u pud. Ki la ïaid bha shakhmat bad kaei kaba la ïasoi ha ka jingdon ryngkat lang u Union Home Minister ka dei kaba teh lang ïa baroh ar ki Sorkar.
Lah ban pynkynmaw hangne ba ki don khatar tylli ki jaka ha khappud ba la ithuh kum kiba don ka jingïakajia hapdeng ka Meghalaya bad Assam, bad ha u Lber 2022 ar ngut ki Myntri Rangbah ki la soi ïa ka Soskular (MoU) pynbeit pud ha ka kylla ba nyngkong ïa ki hynriew tylli ki jaka, ba kynthup ïa ka Hahim, Gizang, Tarabari, Boklapara, Khanapara-Pilangkata bad Ratacherra. Katba hynriew tylli ki jaka ba dang sahteng ban pynbeit ïa u pud u sam ha ka kylla ba-ar ki kynthup ïa ka Langpih, Bordwar, Nongwah Mawtamur, Khanduli, Umkhyrni Psiar, Block I bad Block II.
