New Delhi, Naitung:
Ki la don palat 145 ngut ki briew kiba la ïap na kiba bun ki jingjia jong ka jingshlei um naduh ba la sdang ka jingwan hap jong u slap ha kiba bun ki bynta ba shaphang Shatei jong ka ri. Ka jingshlei um bad ka jingtwa khyndew ka la nang ïai bteng ha ki jylla kiba don ha ki jaka lum kum ha Himachal Pradesh bad ha Uttarakhand, ha kaba ki la don bun ngut ki nongjngohkai pyrthei kiba la sahkut lynti.
Ka Himachal Pradesh ka la shah ktah jur na ka jingwan hap jong u slap namar kumba 91 ngut ki briew kiba la ïap, 14 ngut ha Uttar Pradesh, 16 ngut ha Haryana, 11 ngut ha Punjab, bad 16 ngut ha Uttarakhand. Ki heh ba dei khmih jong ka Himachal Pradesh ha ka sngi Ba-ar ki la ong ba na ka jinglum jingtip, la ong ba ki la don kumba 31 ngut ki briew kiba la ïap ha ki lai sngi na ka jingtwa khyndew bad ki jingshlei um kiba la khang lajan 1,300 tylli ki surok bad pynjulor ruh ïa kumba 40 tylli ki jingkieng kiba heh.
Ka Himachal ka la duhnong bha na ka jingwan thombor ki bor mariang ha kaba la ong ba kane ka la kot sha ka T. 1,050 klur naduh ba la sdang ka jingwan hap jong u slap ha ka 24 tarik, Jylliew bad ki la don baroh kumba 80 ngut ki briew kiba la ïap katba 10 ngut kiwei pat ki la mynsaw.
