Punjab, Naitung:
Ki la don kumba 1,058 tylli ki shnong jong ki 14 tylli ki distrik ha Punjab kiba la shah ktah jur na ka jingshlei um, la ong ka jingthoh ba la phah da ki heh sorkar. Ki shnong kiba la shah ktah ki kynthup ïa 364 tylli ha Rupnagar, 268 tylli ha Sahibzada Ajit Singh Nagar, 250 tylli ha Patiala, 71 tylli ha Jalandhar, 30 tylli ha Moga, 25 tylli ha Hoshiarpur, 16 tylli ha Ludhiana, mar 3 tylli ha Sangrur bad Ferozepur, bad 6 tylli ha Tarn Taran, la ong ka jingthoh na ki Gaushala kiba don ha Brahman Majra, Sirhind, Fatehgarh Sahib. Ha kane ka jingjia kumba 800 tylli ki masi la ïoh ban pyllait im ha ka por ba la don ka jingpyntreikam, la ong shuh shuh ka jingthoh.
Ka jingïap jong ki masi la ïoh jingtip ba ka la long na Fatehgarh Sahib, Sahibzada Ajit Singh Nagar, Shaheed Bhagat Singh Nagar, Tarn Taran bad Jalandhar, la ong ka jingthoh.
Nalor kane ka jingthoh ka la ong ba ki la don ruh kumba 6,300 tylli ki syiar kiba la ïap ha Shaheed Bhagat Singh Nagar, bad 8 tylli ki khun sniang, 7 tylli ki sniang bad kawei ka blang ki la ïap ha Sirhind City namar ka jingshlei um.
Ka Relief and Rehabilitation Department ka dang bteng mynta na ka bynta ban ai ki jingïarap bad ban ai jaka sah ïa ki bym don ïing shuh ha kiba bun ki distrik hadien ka jingshah ktah jong ki na ka jingshlei um.
U Myntri Rangbah jong ka jylla u Bhagwant Mann shen un sa pyllait ïa ka pisa kaba T. 71.50 klur na ka bynta ban ai jingïarap sha ki briew kiba la shah ktah na ka jingshlei um ha ki thaiñ ba la shah ktah jur, la ong u Myntri ka Revenue, Rehabilitation and Disaster Management u Bram Shanker Jimpa.
