New Delhi, Naitung:
Ka ïingbishar ha Delhi ha ki khyndait sngi jong ka taïew ba la dep ka la ai por ïa ka kynhun CBI haduh ka 8 tarik, Nailar na ka bynta ban ïoh jingbit ha ka ban rai pynrem ïa u Myntri barim ka tnat Railway u Lalu Prasad bad ïa ki katto katne ngut ki heh sorkar jong ka Public Sector Transport ha kaba ïadei bad ka jingjia jong ka jingshah kynnoh donkti ha ka kam bamsap kaba la mih na ka jingïapeiñ hapdeng ka kam bad ka jaka.
Ka nongbishar bakyrpang ka Judge Geetanjali Goel ka la pynbna ba la ai por ïa ka kynhun CBI hadien ba ka kynhun tohkit jong ka sorkar kmie ka la buh jingkyrpad ha kaba ïadei bad kane ka bynta.
Ka kynhun CBI ha ka 3 tarik, Naitung ka la buh da ka jingmudui pyrshah ïa u Lalu Prasad, uba dang ïai bteng ban long u President jong ka seng RJD kaba u la seng, ïa ka kurim jong u kaba long ka Myntri Rangbah barim jong ka Bihar ka Rabri Devi bad ïa u khun jong u uba long ruh u Symbud Myntri Rangbah jong ka jylla u Tejashwi Yadav ha kaba ïadei bad ka jingshah kynnoh donkti ha ka kam bamsap.
Kane ka dei ka jingmudui ha ka sien kaba ar da ka kynhun CBI ha kaba ïadei bad ka jingjia hynrei kaba nyngkong ha kaba u Tejashwi Yadav u la shah pynpaw kyrteng kum uba la shah kynnoh donkti lang.
