Lucknow, Naitung:
Ka heh nongïalam jong ka seng Bahujan Samaj ka Mayawati ka la ong ba ka la don ka jingsngewkhia ha kaba ïadei bad ki jingjulor bad ki jingshah pynduh jong kiba bun ki jingshna na ka jinghap jong u slap ba jur ha kiba bun ki bynta jong ka ri. Halor kane ka la ong ba ka sorkar kmie ka la dei ban pynkloi ha kaba ïadei bad ka jingai jingïarap sha ki jylla kiba la shah ktah jur na ka daw jong ka jinghap jong u slap. Kumba la sakhi, la ong ba kiba bun na ki longïing ha kiba bun tylli ki jylla ki la shah ktah jur na ka jingjur slap khamtam na ka jingtwa khyndew bad ka jingshlei um.
Ka Myntri Rangbah barim jong ka Uttar Pradesh ka la ong ba ki jinglong jingman ha ki thaiñ nongkyndong ki la kham sniew. “Na ka daw jong ka jingjur palat jong u slap bad ki jingshlei um ha kiba bun ki jylla jong ka ri, kynthup ha UP, ka rukom im jong ki briew ka la shah ktah jur haduh katta katta. Ki la don ki mynsiem kiba la duh, ki jingri bad kumjuh ki jingdon jingem. Ki jinglong jingman ha kiba bun ki nongbah ki la shah ktah jur, hynrei ka jinglong jingman jong ki briew ha ki thaiñ nongkyndong ki la kham shah ktah jur namar ka jingkhyllem jong ki ïing bad ki jingshah pynjulor jong ki jingthung jingtep,” ka la ong ha ka jingphah jingthoh lyngba ka Twitter.
“Ha kum kine ki bynta, baroh ki sorkar jylla ki la dei ban shim khia bad ban shim ka jingkitkhlieh na ka bynta ban ai jingïarap sha ki briew khamtam sha kito ki longïing kiba la shah ktah jur.
