New Delhi, Naitung:
Ka kynhun jong ka National Investigation Team ka la thmu ban leit sha United States kum shi bynta ban ïoh tohkit halor ka jingthombor jong ki nong Khalistan ïa ka Indian Consulate ha San Francisco ha ka 2 tarik, Naitung.
Kumba la ïathuh ka tyllong khubor, la ong ba ka kynhun NIA kan sa leit sha San Francisco na ka bynta san sngi hadien ka 17 tarik, Naitung ha kaba la ai jingbit da ka Ministry of Home Affairs. Dang shen, ka kynhun NIA ka la dep ban buh da ka jingmudui ejahar ha kaba ïadei bad kane ka jingjia.
Shuh shuh la ïathuh ba kane ka kynhun kan sa tohkit ruh ha kaba ïadei bad ki jingthombor ïa ka Indian Embassy ha Canada.
Ïa ka jingtohkit ha kaba ïadei bad kine ki ar tylli ki jingjia la aiti sha ka NIA da ka Ministry of Home Affairs.
Ha ka 2 tarik, Naitung, ka Video ba la pyllait da ki nongkyrshan jong ka Khalistan ha ka Twitter ka la pyni ïa ki kam ba la leh halor ka jingthombor ïa ka Indian Consulate ha San Francisco.
Ha ryngkat ka Video, la buh ruh ïa ki jingthoh kiba ïadei bad ka jingïap jong u heh ka seng Khalistan Tiger Force (KTF) ha Canada u Hardeep Singh Nijjar.
U Nijjar, u la long uwei na ki lehnoh ba ka ri India ka la kwah ban kem ha kaba la thong ruh da ka buskit kaba T. 10 lak ha ka khlieh jong u, une u la shah siat ïap habar jong ka Gurdwara kaba don ha Canada ha u bnai ba la lah.
Ka la long ha ka sien kaba ar hapoh khyndiat bnai ba ka Indian Consulate ha San Francisco ka la shah thombor ha ki nongkyrshan jong ka Khalistan.
