Thiruvananthapuram, Naitung:
U Myntri Rangbah barim jong ka Kerala bad u heh nongïalam jong ka seng Congress u Oommen Chandy u la khlad noh namar ka jingshitom kaba la bat slem ïa u ha Chinmaya Hospital kaba don ha Bengaluru ha ka por 4.25 hynnin ka step. U Oommen u la khlad ha ka rta kaba 79 snem.
U khun jong u u Chandy Ommen u la pyntikna halor ka jingkhlad noh jong u kpa jong u lyngba ka Facebook Post. U Myntri Rangbah barim u la shah sumar ha Bengaluru da kumba katto katne bnai.
U la iehnoh shadien ïa ka kurim jong u, ka Mariamma Ummen, ki khun kynthei kiba kynthup ïa ka Achu Oommen bad ka Maria Oommen, bad ïa u khun shynrang u Chandy Oommen. Ha kaba ïadei bad kane, ka sorkar Kerala ka la pynbna shuti hynnin ka sngi kum shi bynta ban sngewlem halor ka jingkhlad noh jong u.
