Mumbai, Naitung:
U nongïalam jong ka liang pyrshah ha ka Maharashtra Legislative Council, u Ambadas Danve, ha ka sngi U Blei u la kynthoh jur pyrshah ïa ka sorkar jong u Eknath Shinde bad u Devendra Fadnavis bad ong ba kine kim shym la lah ban leh ei ei ha kaba ïadei bad ka jingwanrah ïa ka bha ka miat hapoh ka jylla.
Ha ka jingai jingkren sha ki nongthoh khubor, u la ong ba ka sorkar jylla ka dei kaba pyrshah ïa ki nongrep bad ïa ki paidbah.
Kumba la sakhi, la ong ba ki la don shibun ki jingeh kiba la mih ha ka jylla khamtam ka jingshah ktah jong ki riewpaidbah ha kiba bun ki liang khamtam ki baduk.
“Wat lada hashwa ka la don ka jingpynbna halor T. 350 shi kwintal na ka bynta u piat da ka sorkar, kam shym la ai wat tang shi bynta ruh ka jingai jingmyntoi sha ki nongrep. Kumjuh ruh ka dor jong u kynphad ka la hiar bha na ka T. 12,000 haduh T. 6,000. Ka sorkar ka la dei ban ai jingmyntoi arshah sha ki nongrep kiba la ïakynduh jingeh na ki jngduhnong namar ka jingwan hap jong u slap uba jur, hynrei kam shym la leh ei ei,” u la ong.
Haba ïakren shaphang ki jingjia jong ki jingpynïap hi jong ki nongrep ha ka jylla, u nongïalam jong ka liang pyrshah u la ong ba kane ka sorkar kam shym la lah ban leh ei ei ha kaba ïadei bad ka jingkhanglad ïa ka jingpynïap hi jong ki nongrep.
Kum shi bynta ban kynthoh shuh shuh ïa kane ka sorkar, u la pynpaw ba u da sngew khuslai eh halor ki kam pynïap briew kiba la jia ha ka jylla bad ka jingjyllei ki kam sniew pyrshah ïa ki kynthei.
U Danve u la pynshisha shuh shuh da kaba ong ba ki la don shibun ki kam bamsap ha kaba ïadei bad ka jingshna ïa ka Samruddhi Highway.
