New Delhi, Naitung:
U nong Pakistan uba ju phah ïa ki tiar siat ha Dubai, ïa uba la tip kyrteng kum u Hamid, u la phah ïa ki tiar siat ha kaba ïadei bad ka jingpynïap ïa u nongrwai Punjabi bad u riewsaiñ pyrthei u Sidhu Moosewala ha u bnai ba la lah, la ïathuh ka kynhun National Investigation Agency (NIA).
Ki heh ka kynhun, ki la ong ba ka kam ba la leh da une u nong Pakistan ka la paw ha ka sien kaba nyngmkong ha kaba ïadei bad ka jingpynïap ïa u Moosewala.
U Hamid u la ïakynduh ruh wat ïa u Shahbaz Ansari, uba long u nongphah tiar siat na Bulandshahr jong ka kynhun runar jong u Lawrence Bishnoi, ha Dubai hashwa ka jingshah pynïap jong u Moosewala bad ïathuh sarong ha u shaphang u nongïarap ba ïajan uba la ïatreilang bad ka kynhun runar jong u Satinderjit Singh, ba la tip ruh da ka kyrteng kum u Goldy Brar, u nongïarap ba ïajan jong u Bishnoi uba na Canada, la ïathuh shuh shuh ki heh jong ka kynhun tohkit.
Kumba ka la jia, la ong ba u Moosewala u la shah siat ïap ha ki hynriew ngut ki runar da ki suloi bad ki pistol ha ka shnong Jawaharke kaba don ha Mansa distrik ha Punjab ha ka 29 tarik, Jymmang jong u snem ba la lah.
