New Delhi, Naitung:
U Myntri Rangbah u Arvind Kejriwal u la pynbna ba ka sorkar Delhi kan sa pynbiang jingïarap pisa kaba mar T. 10,000 sha ki longïing kiba la shah ktah jur na ka jingshlei um. Lyngba ka Twitter u la ong, ba ki la don bun tylli ki longïing jong ki briew ki baduk kiba sah harud jong ka wah Yamuna ki la duh noh ïa ki ïing jong ki na ka jingshlei um bad ki la don kumba katto katne tylli kiba la duhnoh ïa ki jingdon jingem.
“Ka jingïarap pisa kaba mar T. 10,000 yn sa ai sha ki longïing jong kito kiba la shah ktah na ka jingshlei um,” la ong u Kejriwal. Ka sorkar AAP kan sa buh ruh ïa ki jaka sah ba kyrpang na ka bynta kito ki briew kiba la duhnoh ïa ki Aadhaar Card bad kiwei pat ki kot donkam, bad ban pynbiang ïa ki kot bad ki jaiñ na ka bynta ki khynnah kiba la shah ktah, la ong u Myntri Rangbah. Ha kaba ïadei bad ki rukom pyntreikam halor ka jingshlei um, u Kejriwal u la ong ba la pyndonkam ïa ki Pump na ka bynta ban tan ïa ka um na ki thaiñ ba la ngat ha ka jingshlei um. Kane ka jingpyntreikam ka la long ha kiba bun ki jaka, hynrei ka um katba nang mih ki sngi ka la nang kiew, u la ong.
