Mumbai, Naitung:
Ki pulit jong ka Mumbai ha ka sngi Ba-ar ki la ïohpdiang ïa ka khubor pyntriem, ha kaba u briew uba la phone u la byrngem ban leh ïa ka kam thombor kumba la jia ha Mumbai.
Kumba la ïathuh ka tyllong khubor la ong ba u briew uba la phone u la byrngem ban thombor ïa u Myntri Rangbahduh u Narendra Modi bad ïa u Myntri Rangbah jong ka Uttar Pradesh u Yogi Adityanath. Ka mukotduma hapoh ka kyndon 509 (2) jong ka Indian Penal Code (IPC) la mudui pyrshah ïa u briew u bym shym la lah ban ithuh, la ïathuh ki pulit jong ka Mumbai.
Hashwa kane kata ha ka 12 tarik, Naitung ruh, ki pulit jong ka Mumbai ki la ïohpdiang ïa ka khubor pyntriem na u briew u bym shym la lah ban ithuh, ha kaba u la byrngem ban leh ïa ka kam thombor kumba la leh ha ka jingjia ba la jia ha Mumbai ha ka 26 tarik, Naiwieng, 2008 da ki lehnoh.
Ïa kane ka Call la phah ha kaba ïadei bad ka Seema Haider, kaba la phet na Pakistan ha ryngkat saw ngut ki khun bad rung beaiñ ha India lyngba ka Nepal. U briew uba la phone u la maham ban leh ïa ka kam thombor lada jia ba ka Seema kam leit phai sha ka ri jong ka.
Ha kaba ïadei bad kane, kham hadien, ki pulit jong ka Mumbai ki la ong ba kane ka dei ka khubor thok ba la ïohpdiang bad hukum ïa ki bor ba dei khmih ba kin pynlong ïa ka jingtohkit kaba bniah.
