Srinagar, Naitung:
Ka kynhun State Investigation Agency (SIA) jong ki pulit ka Jammu & Kashmir ha ka sngi Ba-ar ki la pynlong ïa ka jingleit khynra ha kiba bun ki jaka kiba don ha ki bynta ba shaphang Shathie jong ka Kashmir ha kane ka por ba don ka jingtohkit bniah halor ka jingdon jong ka jingpynïap ïa ki Pandit kiba dei ki nong Kashmir ha basdang jong une u snem, la ïathuh ki heh jong ka kynhun tohkit.
Uwei u Pandit jong ka Kashmir ïa uba la tip kyrteng kum u Sanjay Sharma, uba la trei kum u nongpahara ha kawei ka ATM, u la shah siat ïap ha ki suba lehnoh ha ka thaiñ Achan jong ka Pulwama distrik kaba don ha ki bynta ba shaphang Shathie jong ka Kashmir ha ka 26 tarik, Rymphang.
Ka jingjia jong ka jingshah pynïap jong u Sharma ka dei kaba la tohkit hashwa da ki pulit jong ka Pulwama bad hadien kane, la aiti noh ïa ka ban tohkit da ka kynhun SIA ka Kashmir.
Ki heh jong ka kynhun wadbniah ki la ong ba ïa ka jingleit khynra la pynlong ha ka por ba dang step ha katei ka sngi ha ki distrik kiba don ha ka bynta ba shaphang Shathie jong ka Kashmir kiba kynthup ha Shopian, Kulgam, bad Anantnag. “Ïa ka jingleit khynra la pynlong hadien ba la dep ban phah ïa ki shithi maham ban leit khynra da ka Special Court,” ki la ong.
