New Delhi, Naitung:
U Myntri Rangbahduh Narendra Modi hynnin ka sngi u la pynpaw ka jingsngewkhia mynsiem bad ka jingbitar ha kaba ïadei bad ka jingjia jong ka jingsaphriang paidbah ka ‘video’ halor ka jingshah pynïaid lyngkhuit jong ar ngut ki kynthei ha Manipur. Kane ka la jia ha ka sngi Balang, bad u la maham jur ba kito kiba donkti kin ym lait na ki kti jong ka aiñ.
U Myntri Rangbahduh u la ong ruh ba kane ka jingjia ha ka jylla Manipur ka la pynjah burom haduh katta katta ïa ka ri na kane ka jingshah leh donbor kine ki kynthei.
“Nga kwah ban pyntikna ïa ka ri, ba yn ym pyllait ïa kiba la leh ïa kaba bakla. Yn sa pynshitom ïa ki katkum ki kyndon jong ka aiñ. Kaei kaba la jia ïa ki khun kynthei jong ka Manipur yn ym lah ban map,” la ong u Myntri Rangbahduh ha ka jingai jingkren jong u hashwa ban sdang ka dorbar Lyiur hapoh ïingdorbar.
Kane ka ‘video’ kaba la wanrah ka jingpynrem jur na kiba bun bad kaba la dawa ba la dei ban pynshitom ïa kiba la donkti, ka la pyni ba ki la don ar ngut ki kynthei kiba la shah pynïaid lyngkhuit ha ka kynhun jong u paid-bhur ha Manipur ha ka 4 tarik, Jymmang, shi sngi hadien ba ki la mih ki jingjia ïakynad hapdeng ka kynhun Meitei bad ka kynhun Kuki ha ka jylla ba la synshar da ka BJP halor ka jingdawa jong ki Meitei ïa ka bhah ba kyrpang ban shah kynthup ha ka Scheduled Tribes (ST). Kumba la ïohi, la ong ba kine ki kynthei ki la shah jrong kti bad shah paring sha ka lyngkha, ha kaba ki la pynshisha ba ki la shah leh beijot ruh.
Ha kaba ïadei bad kane ka jingjia, la ïoh ban kem ïa uwei u briew hynnin ka sngi hadien ka jingsaphriang jong ka Video, kaba la long 77 sngi hadien ba la jia ka jingjia.
