Chennai, Naitung:
Ka kynhun Enforcement Directorate (ED) ka la pynlong ïa ka jingleit khynra ha ki jaka sah bad ki jingdon jingem jong u Myntri ka Tamil Nadu u K Ponmudy lem bad u khun jong u ha ka Lah Sngi U Blei.
Ha ka por ba la pynlong ïa ka jingleit khynra, ka kynhun tohkit ka la ong ba ka la ïoh ban kurup ïa shibun ki jingthoh bad ki kot ki sla kiba long beaiñ, ka pisa ka bym lah ban batai ïa ka jingwan jong ka kaba la kot sha ka T. 81.7 lak bad ka pisa bar ri kaba la antad ba ka la don T.13 lak. Nalor ki Fixed Deposits (FDs) kaba T. 41.9 klur la kurup noh ïa baroh.
Ka kynhun ED ka la pynlong ïa ka jingkhynra hapoh ka jingtreikam jong ka Prevention of Money Laundering Act (PMLA), 2002 ha ki 7 tylli ki jaka kiba don ka jingïadei bad u Ponmudy lem bad u khun jong u, u Gautam Sigamani, uba long u dkhot jong ka Lok Sabha.
Ka kynhun Enforcement Directorate ha ka sngi Ba-ar ka la pynshisha da kaba ong ba u heh nongïalam jong ka seng DMK bad u Myntri ba dei khmih ïa ka Higher Education ka Tamil Nadu u K Ponmudy u la ai da ki License thok na ka bynta ka jingtih ïa u shyiap sha u khun jong u u MP, sha ki bahaïing bad sha ki briew kiba leh ïa ki kam beaiñ, bad da ka pisa kaba la ïoh na kine ki rukom pyntreikam ha kaba tih beaiñ ïa u shyiap la thied ïa ki kompeni kiba don shabar ri, la ïathuh ka tyllong khubor.
Kane ka jingtohkit kaba mynta ka dang ïai bteng ha kaba ïadei bad ka jingmudui ba la phah da u Directorate of Vigilance and Anti-Corruption (DVAC) pyrshah ïa u Myntri ha u snem 2012 halor ka jingkynnoh ba u la pyndonkam bakla ïa ka kyrdan jong u ha ka por ba u dang long u Myntri ba dei khmih ïa ka Mines and Mineral Resources hapdeng u snem 2007 bad u 2011.
