Jowai, Naitung 21:
Ka Ladthalaboh ka la pynjem khnap ïa ka Salaroh haduh shiteng dorjon (6-0) ha ka lympung ïalehkai U-17 Independence Day Cup Football Tournament ba la pynïaid da ka West Jaiñtia District Sports Association.
U Kyntulang Nongwa u la ïoh ban thep ar kol ha ka minit kaba 35 & 54, katba ïa kiwei pat la thep da u Help me Syntem (7), Chanmi Phawa (15), Alfred Dkhar (34), bad u Marbudki Dkhar (60+2).
Haba phai sha ka jingïalehkai kaba bud hapdeng ka Khimusniang bad ka Catholic Youth ki la ïasam mar shi dor-thong (point) hadien ba ki la ïakhaid mar 2-2 kol.
Ha kane ka jingïakhun ka Catholic Youth ka la ïoh ban thep kol nyngkong lyngba u Donal Phawa ha ka minit kaba 13 bad u Kyrshon Suchen ha ka minit kaba 16, hynrei u Heiminmiki Dkhar u la lah ban pynphai kylla ar kol na ka bynta ka Khimusniang ha ka minit kaba 24 & 40.
Ka jingïalehkai ha ka Sngi Saitjaiñ kan long hapdeng ka Mukhla Raij pyrshah ïa ka Evergreen Mukhla ha ka por 1:30 nohphai sngi bad ka Dulong ïa ka Mulang Ïalong ha ka por 3 baje janmiet.
