New Delhi, Naitung:
Shi sngi hadien ba la mih ki kynrum kynram hadien ka jingsaphriang jong ka dur khih (video) halor ka jingshah pynïaid lyngkhuit jong arngut ki kynthei ha Manipur ha surok ha ka kynhun ki paidbhur, ka la don ka jingpynkut noh ïa ka dorbar ha baroh ar tylli ki ïingdorbar, ka sorkar kmie ka la ïakynduh jingeh sa ha kawei pat ka bynta halor ki kam saiñ pyrthei ha ka sngi kaba ar jong ka jingpynlong ïa ka Dorbar Lyiur.
Ha kaba ïadei bad kane, ka liang pyrshah ha ka sngi Palei ka la dawa ba la dei ban pynsangeh shwa ban ïakren halor kiwei pat ki mat bad ïa mynta la dei ban ïakren sani bha halor ki mat ba ïadei bad ka Manipur, hynrei na ka liang ka sorkar ka la mynjur ban pynlyngkot ha ka jingïakren halor kane ka mat ba ïadei bad ka Manipur.
Ka liang pyrshah ka la dawa ba la dei ban ai por ha ka ban ïakren halor ka Manipur hapoh ka jingpyntreikam ïa ka kyndon 267, katba ka sorkar kmie ka la mynjur ban pynlyngkot ïa ka jingïakren hapoh ka kyndon 176.
Ha kaba ïadei bad kane, na ka liang u Myntri ka Junior Parliamentary Affairs u Arjun Ram Meghwal u la pynshisha da kaba ong ba ka jingleh jong ka liang pyrshah ka paw ba kam kwah ban ïakren halor ka Manipur.
