Dehradun, Naitung:
Hadien ba 40 million ngut ki riewngeit jong u Shiva ki la leit ban jngoh ïa ka Haridwar ha Uttarakhand na ka bynta ka jingdon jong ka Kanwar Yatra kaba manla u snem, ki bor ba dei khmih ki ju pynkhuid ïa kumba 30,000-tonne ki jaboh na ki Ganga Ghats, ki ïew, ki jaka pynïeng kali bad ki surok kiba don ha ka surok kaba 42 km ba la tip kum ka Kanwar Stretch na Har-ki-Pauri.
Ka tyllong khubor ka la ïathuh ba ki bor ba dei khmih halor ka jingpynkhuid ki la hap ban trei man ka por na ka bynta ban pynkhuid ïa ki jaboh.
Kumba la ïoh jingtip, la ong ba ki heh ba dei khmih, ki la ong ba khnang ban pynkhuid ïa ka nongbah, ki la donkam da kumba katto katne taïew na ka bynta ban lah ban pyndep.
Kane ka la long na ka jingsaphriang palat ki jaboh. Ka jingsaphriang jong ki jaboh ka la buh ïa kiba bun ha ki jingeh khamtam naba la mih ki jingsma kiba lah ban ktah ïa ka koit ka khiah jong ki briew kiba dei ban ïaid lynti lyngba kitei ki jaka bad kumjuh ïa ki briew kiba shong basah ha marjan jong kitei ki jaka.
Ki bor ba dei khmih ki la bthah ïa ki nongleit jngohkai pyrthei bad kumjjuh ïa ki riewngeit ba ki dei ban lehkhuid katba lah ha kine ki jaka.
U Commissioner jong ka Municipal Town u Dayanand Saraswati u la pyntip sha ki lad pathai khubor ba ka jingpynkhuid ka la sdang ha ka sngi Saitjaiñ bad ka la ïai bteng kum ban ong noh ha baroh 24 kynta ha ki bynta kiba don harud ka wah Ganga, ki surok, ki jingkieng, ki jaka pynïeng kali bad ki jaka pynïeng jong ki bos.
