Lucknow, Naitung:
Ka heh nongïalam jong ka seng Bahujan Samaj Party (BSP) ka Mayawati ka la dep ban pynbna ba ka seng jong ka kan ym ïatreilang bad ka kynhun synrop jong ki 26 tylli ki seng ne ka INDIA ne bad ka kynhun jong ki 39 tylli ki seng jong ka kynhun synrop NDA.
Ha ka jingai jingkren ha ka jingïalang bad ki nongthoh khubor, ka Mayawati ka la ong ba kan sa pynjngai ha ka ban ïatreilang bad kine ki kynhun bad ban ïakhun ïa ka ilekshon Lok Sabha ka ban sa wan dalade hi.
Ka heh nongïalam jong ka seng BSP ka la ong shuh shuh ba ka seng kan sa ïakhun marwei ha ka ilekshon Assembly jong ka Rajasthan, Madhya Pradesh, Chhattisgarh.
Ha Punjab bad Haryana, kan sa lah ban ïatreilang bad ka kynhun synrop jong ki seng riewlum lada jia ba kim ïatreilang bad ka kynhun NDA ne ka UPA.
Ka Mayawati ka la ong ba ka seng Congress ka la thaw ïa ka kynhun synrop halor ka jingthmu jong ka ba kan ïohlad ban thaw sorkar ne ban ïoh bat ïa ka bor synshar.
“Kine ki seng kim ju trei na ka bynta ka bha ka miat jong ki paidbah. Kim shym la leh ei ei na ka bynta ki Dalit, Muslim bad ki rit paid. Baroh ki long kumjuh. Haba ki la wan ha ka bor synshar, ki la klet noh ïa ki jingkular baroh. Kim ju pynurlong ïa ki jingkular ba ki la khlei sha ki paidbah. La ka long ka seng Congress ne ka seng BJP. Kane ka long ka daw ba balei ka seng BSP kam ïasnohkti bad ka kynhun pyrshah,” la ong ka Mayawati.
