New Delhi, Naitung:
U nongïalam jong ka seng Lok Janshakti Party (Ram Vilas) u Chirag Paswan u la ong ba ka seng jong u ka la leit ban pynïasoh bad ka kynhun National Democratic Alliance hadien ba u la shim ïa ka rai bad ka seng BJP halor ka jingkhuslai bad ka jingpynbna ba ka seng kaba bat ïa ka jingsynshar kan sa jop ha baroh 40 tylli ki konstitwensi ha Bihar ha ka jingïakhun ïa ka ilekshon Lok Sabha 2024.
Ha ka por ba u la kyntait ban ïathuh bniah halor ki jingïakren jong u bad ki nongïalam jong ka seng BJP, kynthup bad u Myntri ka sorkar kmie uba dei khmih ïa ka tnat ki kam pohïing, u Amit Shah bad u President ka seng u J P Nadda, u la ong ba ka jingkhuslai jong u ka long ha kaba ïadei bad ka ilekshon Lok Sabha bad Assembly ha Bihar ha kaba la pynpaw da ki hi.
Ha ka jingai jingkren ha ka jingïalang bad ki nongthoh khubor, u Paswan, ha kaba ïadei bad kane, u la pynshai da kaba ong ba un sa ïakhun na Hajipur, kaba dei ka Lok Sabha konstitwensi ba la mihkhmat da u kñi jong u uba la kynriah noh bad u Myntri ka sorkar kmie u Pashupati Kumar Paras uba ha ka jingpynphai ktien u la ïathuh bniah halor kane ka konstitwensi.
U Paswan u la bynrap shuh shuh da kaba ong ba ka seng jong u kan sa long shi bynta jong ka kynhun NDA ba la lamkhmat da ka seng BJP ha ka jingïakhun ïa ka ilekshon Assembly ha Bihar ha u snem 2025 ruh kumjuh.
