Mumbai, Naitung:
U Myntri Rangbah jong ka Maharashtra u Eknath Shinde un sa ri bad sumar ïa ki khynnah kiba la duhnoh ïa la ki kmie ki kpa na ka daw jong ka jingtwa khyndew ha ka shnong Irshalwadi ha Raigad distrik jong ka jylla, la ïathuh ka seng Shiv Sena.
“Ha Irshalwadi ki la don bun ngut ki khynnah kiba la duh noh ïa ki la kmie ki kpa. U Myntri Rangbah u la pynbna ban ri bad sumar ïa kine ki khynnah bad ban long u nongkhmih bniah na ka bynta jong ki. U Myntri Rangbah u la rai ba kine ki khynnah kiba don hapdeng ka rta kaba 2 snem bad 14 snem kin sa shah sumar ha ka Shrikant Shinde Foundation,” la ong ka seng Shiv Sena.
“Baroh ki jinglut ha kaba ïadei bad ka pule-puthi bad kiwei pat ki jingdonkam yn sa pynbiang da ka Shrikant Shinde Foundation ba la pynïaid da u khun jong u Eknath Shinde. Ïa ka FD (Fixed deposit) yn sa buh na ka bynta iwei pa iwei i khynnah na ka bynta ki jingpule jong ki,” la ong u Mangesh Chivte, uba long u OSD sha u Myntri Rangbah u Eknath Shinde.
Ka kynhun National Disaster Response Force (NDRF) ka dang ïai bteng na ka bynta ban pynlong ka jingwad bad pyllait im ïa ki briew kiba la ïakynduh jingeh na ka jingtwa khyndew ha katei ka shnong.
